今年美股同英國股市雖然創新高，但都唔及黃金咁威。黃金價格真係好耐無走得咁快，咁犀利。我英國股票組合入面有隻金礦股，短短幾個月升咗成一半，真係有啲驚喜。
過去12個月，黃金價格從每盎司1,900美元水平上升至2,700美元水平，增幅接近40%，升勢真係沒法擋。
圖：黃金價格一年走勢(截至22/10/2024)
金價點解會升？
傳統嚟講，黃金升值主要受以下幾個因素影響：
1. 通脹：通脹高嘅時候，錢越嚟越唔值錢，大家就搶住買黃金保值。
2. 低利率：當利率低，擺錢喺銀行或者買債券回報唔多，大家就會轉去買黃金，雖然冇利息收，但有升值機會，咁資金就自然流入黃金。
3. 美元貶值：黃金係用美元計價，當美元貶值，大家就會換黃金保值，所以一般嚟講，美元跌，黃金就升。
4. 國際局勢緊張：如果世界有衝突、戰爭或者經濟動盪，黃金就成為避風港，資金湧入，金價自然就升。
2024年金價升得咁勁，除咗傳統因素之外，仲有其他原因，例如唔少國家嘅中央銀行，密密咁入貨，推動金價好似唔使回氣咁，節節上升。
投資黃金有乜方法呢？
至於點樣投資黃金，今時今日有唔少選擇：
1. 買實金
呢個係最古老嘅方法，老人家都識。不過要留意有冇安全嘅地方擺放，而且冇利息收，只能靠黃金升值。
2. 投資黃金ETF
好多黃金ETF都係追蹤倫敦金價嘅基金，好似買股票咁方便操作，英國同美股市場都有好多黃金ETF選擇，但同樣係冇息收。
3. 金礦股
投資黃金開採公司，升得快但風險都大啲。我自己持有嘅金礦股呢排就升咗一半，真係幾可觀。
不過要指出，投資黃金唔係咁容易，冇耐性嘅話隨時會失手。
遲下我都會出片同大家具體講下黃金投資嘅策略，同埋係英國同美國上市嘅股票當中，有乜好嘅選擇，大家唔好錯過呀！