最近，英國網上投資平台 Trading 212 公布咗佢哋用戶最愛買嘅美股同英股。雖然呢間證券商唔算係英國好大嘅平台，不過作為一個熱門話題，拎嚟討論下都幾有趣。
Trading 212 主要客戶群以小散戶為主，所以佢哋買咩股票，某程度上都反映到散戶投資嘅偏好。
最多人買嘅美股及英股
根據平台嘅統計，最多人買嘅美股，清一色係科技股，包括 Nvidia (NVDA)、Tesla (TSLA)、Apple (AAPL)、Microsoft (MSFT) 同 Amazon (AMZN)。
至於英股方面，最受歡迎嘅股票，就集中喺傳統行業，包括 BP (BP.L)、Rolls-Royce (RR.L)、Legal & General (LGEN.L)、Lloyds (LLOY.L) 同 National Grid (NG.L)。
兩邊嘅選擇，有啲南轅北轍，其實都係反映出美股同英股市場嘅特性有明顯差異。
美股：增長型投資主導
美股方面，散戶投資者追求增長，無論股價有啲好似已經升到去天花板，都有人願意入市。
Nvidia 受 AI 熱潮帶動，股價幾乎狂飆。Tesla 依然係市場焦點，儘管競爭加劇，但仍然吸引大量投資者。
Apple、Microsoft、Amazon 屬於科技巨頭，市場份額穩固，增長穩定。
美國市場一向以創新為主導，特別係科技股，有強勁嘅升值潛力。自然吸引唔少海外嘅投資者。香港亦有唔少嘅散戶好似我咁，早年已經轉咗跑道，由港股轉到美股投資。
英股：穩健派息為主
相比之下，英股市場就穩陣一啲。
BP 係能源巨頭，派息吸引。Legal & General、Lloyds 屬於金融機構，亦以穩派息吸引見稱。
Rolls-Royce 受惠於航空業復甦，National Grid 屬於公用事業股，市場波動對佢影響較低。
英股投資者更加著重穩定回報，特別係高股息吸引長線持有者。
散戶如何善用市場優勢？
其實，呢個統計反映英國嘅小散戶非常懂得善用市場特性。美股市場適合進攻，追求高增長嘅股票，願意承擔較高風險。英股市場則比較防守型，雖然升幅冇美股咁誇張，但穩定派息令資金可以長期留喺市場。
喺英國，各大小證券行好多都提供美股同英股嘅選擇，令散戶更容易組合投資策略。
結語：靈活運用市場機會
對於想平衡風險嘅朋友，美股英股雙管齊下，可能一個唔錯嘅策略。當然，最重要嘅係根據自己投資目標，靈活調整，利用市場唔同嘅特質，搵出最適合自己嘅投資機會。