早前港股大幅反彈，但睇落唔少嘅小散戶冇想像中咁興奮。點解？過去十幾年，港股升完一輪之後，好快就打回原形。今次升浪，有人趁機會沽貨離場，手上有錢嘅都唔敢輕易入市。反觀美股同英股，今年不時傳出再創新高嘅消息，咁大家又敢唔敢喺高位入市呢？
港股反彈，會唔會再次打回原形？
港股重上二萬點，已經係近年比較罕見嘅現象。中國出重拳放水救經濟之後，股市大幅反彈。不過，以前試過多次喺大起之後，好快就打回原形，今次大家似乎對港股嘅信心依然不足。雖然今次反彈之後，恒生指數仲可以企喺二萬點水平，但經濟前景未見到會有實質嘅改善，我自己就唔會考慮重新入市，無謂浪費彈藥喺一個前景不明朗嘅市場。與其搏港股，倒不如轉向美股同英股，睇下有冇其他更實際嘅機會。
圖：美股(標普500指數)、港股(恒生指數)及英股(富士100指數)五年走勢
美股高位入市，值唔值？
再睇返美股，近五年嚟標普500指數升咗九成，而納斯達克指數更加升咗一倍以上。咁大嘅升幅，對於未入市嘅人嚟講，當然會有疑問：「而家仲值唔值得入市？會唔會摸頂？」呢個問題好正常，畢竟任何市場當價格創新高時，風險都會增加。
不過，喺呢五年，美股嘅升幅主要集中喺科技股，特別係由「納指七雄」（蘋果、微軟、Alphabet、亞馬遜、Meta、Tesla、輝達）帶動，其他行業其實升幅並唔算好誇張。
如果你係一個想穩陣嘅投資者，依家入市美股嘅確要小心揀股，唔係所有股票都有咁強嘅增長動力。尤其係一啲熱門嘅科技股，雖然升得勁，但價格已經去到相當高位。但另一方面，隨住美國開始進入減息周期，資金成本下降，科技企業特別係細一啲嘅公司有機會翻身，未來有增長空間，加上AI嘅來臨，可以提升科技公司嘅技術同內容，有助業務嘅發展，所以要投資嘅話，就要細心留意各大公司的盈利表現，唔好盲目跟風。
英股慢熱但穩健，係咪一個好選擇？
至於英股，一向以嚟在全球股市當中，表現一向唔突出。有人形容英股係 “恐龍”，上市公司唔少屬於傳統企業，科技股數量唔多。之不過恐龍今年都識得跳，富士100指數唔聲唔聲創下歷史新高。
而家步入減息周期，加上公司經營環境有改善，佔英國唔少比重嘅銀行以及防守性行業，都有捧場客。
我覺得英股一個吸引地方，係佢嘅派息幾吸引；以富士100指數為例，息率接近三厘。股市唔多升，只要唔跌，都可以收到三厘息。減息周期之下，存錢入銀行未必容易搵到3%利息。
我嘅組合裡面都有兩隻派息接近10厘嘅股票，喺呀，差不多10厘嘅股票，係咪有啲跨張😏。
減息周期，投資策略要轉變
美國11月有大選，呢幾個股市場可能有變化，加上美國今年三月大幅減息半厘，揭開咗減息周期嘅序幕，意味住未來資金成本有機會降低。減息嘅環境有助企業獲得更低成本嘅融資，尤其係過去幾年在高息環境下，一啲小型科技股真係跌到四腳朝天，融資環境好咗，有啲真係可以研究一下。
總結：投資港股、英股、美股，點揀？
與其話港股癈，美股貴，不如做多啲功課，睇下有咩潛質股票值得投資。喺減息周期開始嘅時候，企業資金壓力減低，市場可能會有新一輪機會，呢個時候，做好部署先至係關鍵。往後我會同大家深入探討，點樣捉住減息周期嘅投資機會，大家記得留意！