美國大選喺度緊張開打，特朗普同賀錦麗鬥到叮噹馬頭。好多人擔心邊個上場會影響經濟呀、股市呀，但有一班投資者就靜悄悄笑緊，佢哋係邊個？就係投資比特幣嗰班啦！而家比特幣價格越升越有，邊個贏都好似對佢無乜大影響？
包括比特幣在內嘅加密貨幣，喺2022年炒到上新高之後就暴跌，嚇走唔少嘅炒家同小散戶。不過，唔聲唔聲佢又升番上嚟，曾經重上 $73,000 美元水平。人們不禁會問：比特幣係咪真係「翻生」？
圖：比特幣5年股價走勢
比特幣「壞日子過去」？
加密貨幣呢波升勢無論你係唔係加密貨幣嘅忠實擁躉，都有理由覺得比特幣真係似乎返嚟啦！比特幣突然「翻生」？答案可以分幾個層面。
1.政治因素
呢排特朗普同賀錦麗兩位候選人對加密貨幣都似乎表現得幾支持。特朗普甚至高調話要將美國打造成「加密之都」，仲要建立比特幣儲備，呢啲說話無疑係比特幣嘅「強心針」。無論最終邊個當選，美國對加密貨幣嘅態度可能都會有啲「放鬆」，唔再打壓，呢個對市場嚟講係大利好。
2. 市場逐步規範
以前加密貨幣市場亂七八糟，一啲無監管嘅交易所講跑路就跑路，好多投資者因此都唔敢入市。但自從2022年暴跌之後，市場整頓得多規範，連比特幣 ETF 都成為咗選擇，吸引更多機構投資者入市。成個市場規模大咗，資金流動多咗，比特幣嘅穩定性都變得強咗少少。
3. 大環境造就生機
隨住全球步入減息周期，低息環境其實有利於高風險資產，特別係比特幣呢啲「數碼黃金」，咁風險較大但回報高嘅產品自然變得吸引。大家諗諗，買傳統資產利息少，資金當然會追求更高回報。
比特幣唔係人人都啱玩
雖然比特幣翻生聽落去好吸引，但大家都知，加密貨幣嘅價格波動非常大。比特幣今日可能升到笑，明日跌到喊都唔出奇，投資者喺追求回報嘅同時，真係要對風險有清楚認識。呢啲高風險產品唔係適合每個人，如果你冇心理準備，就真係要考慮清楚再入場。
日後我會再同大家講下自己點樣投資呢類高風險產品，我嘅投資點樣又越過高山越過谷！
暫時嚟講，睇住市況，唔好盲目跟風，保持理性，先至係對自己最好嘅風險管理呀！