大家好呀！我的新YouTube投資頻道開通咗嘞，裡面有各類投資嘅內容，唔只係ISA或者英國股票㗎。
呢一集想同大家講下過去一年我點樣同恐龍打交道。
英國股市經常被人取笑做恐龍，即係由一批古老嘅化石組成，市場集中喺三大嘅傳統行業，包括金融、能源、及消費必需品，好似係超級市場等等呀。三大行業嘅比重佔咗富時100指數一半有多。咁嘅比重真係好難預佢可以識得飛。
所以一向以嚟，我都喺投資係美股身上。美股喺科技股帶動之下，一次又一次咁創新高，再望返英股，真係忍唔住會搖頭。
不過，英國有二千幾間嘅上市公司，總有啲優質嘅股份，當遇上適當嘅時機就會有唔錯嘅表現。同時整體嚟講，價格又會比美股平好多。
另一方面，呢隻「恐龍」其實都好闊卓㗎，派息普遍都比美股高。整體嚟講派息有三厘八，當中最大嘅100間公司派息都有3.4厘。呢個亦係佢嘅吸引地方。
2023年嘅年底，我用咗四千英鎊投入ISA嘅投資戶口，組織一個只買英國股票嘅投資組合，想試一吓水溫先。11個多月之後嘅今日，我已經注入多咗一千英鎊入去，因為想買嘅股票越嚟越多，投資方面亦都開始掌握到一啲技巧。
而家我嘅組合一共有11隻股票，當中都有啲似英國嘅股市㗎，金融股同埋超市等嘅消費必需品公司佔嘅比例都幾多吓。不過，我就對資源類股份有啲保留，一來波動性比較大，二來係容易受到中國經濟因素影響。所以暫時我只對投資金礦股有興趣。
由於我揀嘅ISA投資平台，係唔收買賣股票嘅手續費，所以有一點我特別開心，因為派到嘅股息可以全數袋袋平安，持有股數多嘅話，好似個個月有息收咁。
有投資開美股嘅朋友，都知道科技股派息好少，同時買美股收息要比股息稅，又要比證券商嘅手續費，喺七除八扣之下，公司派息都未必有錢落袋。
近一年我嘅成績又係點樣呢？
我手上有啲股票升咗六成，亦有啲派息接近10厘嘅股份。當然，我都試過持有蝕本嘅股票，不過好快就壯士斷臂，賣走晒。
大家睇到，呢11個月裡面，ISA戶口嘅資產，計埋收到嘅股息，以及賣出蝕本嘅股票之後，總共升值咗九百幾英鎊，回報有大約18%，而同時期嘅英國富時指數，只係升咗7%，我對於自己嘅成績，都覺得滿意。
我而家仲有好長嘅買入清單喺手，所以未來我會再調整呢個投資組合，希望可以做到進可攻退可守。
大家可能想知：投資英國股市點樣揀股？有咩需要留意？選擇投資平台時要考慮啲咩？呢啲內容真係多到可以慢慢拆解，之後會陸續分享俾大家！
如果你對英國同美國嘅投資有興趣，記得訂閱我嘅頻道呀！下一集的YouTube內容我會深入講解點樣揀選ISA平台！